|photo : Nepali Sanchar
मेलबर्न, अष्ट्रेलिया – आज नेपाली मधेसी समुदाय भिक्टोरिया (NMCV) द्वारा आयोजित एक विशेष भेटघाट कार्यक्रम सम्पन्न भयो, जसमा अष्ट्रेलियाका लागि सम्माननीय नेपाली राजदूत श्रीमती चित्रलेखा यादव र उनका पति श्रीकृष्ण यादव सहभागी भएका थिए।
ग्लेनरोय, मेलबर्नमा आयोजित उक्त कार्यक्रम राजदूत यादवको नेपाल महोत्सव २०२५ को अवसरमा भएको थियो। कार्यक्रममा वर्तमान तथा पूर्व कार्यसमिति सदस्यहरू समेत उपस्थित थिए।
कार्यक्रमको शुरुवात भिक्टोरियामा रहेका मधेसी समुदायका सदस्यहरूको परिचयसँगै भयो। अष्ट्रेलियाली समाज र अर्थतन्त्रमा विभिन्न क्षेत्रबाट योगदान पुर्याइरहेका समुदायका सदस्यहरूले आफ्नो परिचय गराए।
श्रीकृष्ण यादवले नेपाली समुदायसँग संसारका विभिन्न भागमा भेटघाट गर्दा पाएको अनुभव साझा गर्दै आफ्नो कृतज्ञता व्यक्त गरे।
सम्माननीय राजदूत चित्रलेखा यादवले सबै अतिथिहरूलाई स्वागत गर्दै आफ्नो मातृभाषामा कुराकानी गर्न पाउँदा नयाँ परिवार सदस्य भेटेजस्तै लागेको बताइन्। उनले नेपाली राहदानी (पासपोर्ट) वितरणसम्बन्धी हालका समस्याहरू र तिनका प्रस्तावित समाधानबारे जानकारी दिइन्। साथै, क्यानबेरामा नेपाली दूतावासको आफ्नै भवन निर्माणका लागि आफु संवेदनशील रहेको पनि उल्लेख गरिन्।
उनले नेपालको मधेस (तराई) क्षेत्रका विभिन्न ठाउँलाई पर्यटकीय गन्तव्यका रूपमा प्रवर्द्धन गर्ने विषयमा समेत जोड दिइन्।
यस प्रकारको भेटघाट कार्यक्रमले नेपाली समुदायलाई अझ नजिक ल्याउने विश्वास गरिएको छ।
उहाँ Nepali Sanchar Radio Australia डट कम का लागि सम्पादक तथा संवाददाता हुनुहुन्छ |