मेलबर्नमा भैँसीको मासु भन्दै गाईको मासु बेचिदै

मेलबर्नमा भैँसीको मासु भन्दै गाईको मासु बेचिएको विषयले गम्भीर चर्चा पाएको छ। यस्तो घटनाले धार्मिक तथा सांस्कृतिक संवेदनशीलताको उल्लंघन गर्नुका साथै ग्राहकको भावनासँग खेलवाड गर्ने कार्य भएको देखिन्छ। साथै, यो कानुनी रूपमा दण्डनीय अपराध हो र उपभोक्ताहरूलाई सतर्क गराउने उद्देश्यले एक उपभोक्ताले नेपाली पसलको नाम न खुलाउने तर यहाको नेपाली समुदायलाई जानकारी गराउने उद्देश्यले यो समाचार प्रस्तुत गरिएको छ।

मासु उद्योगमा अनियमितताको इतिहास :  मासु उद्योगमा यस्ता अनियमितताहरू विगतमा पनि भएका छन्। उदाहरणका लागि, 1981 मा अष्ट्रेलियामा घोडा र कंगारुको मासुलाई गाईको मासु भनेर बिक्री गरिएको थियो। त्यस्तै, 2013 मा युरोपमा घोडाको मासुलाई गाईको मासु भनेर बेचिएको काण्ड सार्वजनिक भयो। Tesco, Aldi, र Ikea जस्ता ठूला सुपरमार्केटका फ्रोजन मासु उत्पादनहरूमा घोडाको मासु फेला परेको थियो। उपभोक्ताहरूलाई ठगी गरेको आरोपमा धेरै आपूर्तिकर्ता तथा कम्पनीहरूमाथि कानुनी कारबाही गरिएको थियो। यो घटनाले जापान, अमेरिका, र अन्य देशहरूमा ठूलो असर पारेको थियो।

यसैगरी, 2013 मा चीनमा सुँगुरको मासुलाई भेडाको मासु बनाउने नक्कली प्रक्रिया पत्ता लागेको थियो। केही ठगहरूले रासायनिक पदार्थको प्रयोग गरी सुँगुरको मासुलाई भेडाको मासुजस्तो देखाएर बिक्री गरेका थिए। यो घोटालापछि सरकारद्वारा धेरै व्यक्तिहरू पक्राउ परेका थिए।

मेलबर्नका नेपाली मासु व्यवसायीको प्रतिक्रिया:  मेलबर्नमा आबद्ध नेपाली मासु व्यवसायी सुनिल अधिकारीले यसबारे आफ्नो धारणा व्यक्त गर्दै भने, “आफ्नो मनले मान्यो भने मान्छेले जे गर्दा पनि हुन्छ, तर म पैसा कमाउन उपभोक्ताको भावनासँग खेलवाड गर्न सक्दिन।” सुनिल अधिकारी मेलबर्नको ग्लेनरोयमा रहेको लेकाली मासु पसल सञ्चालन गर्छन्।

भैँसीको मासु सम्बन्धी जानकारी दिँदै उनी थप्छन्, “यहाँ पाइने भैँसी वाटर बफेलो हो, जसमा बोसो एकदम कम हुन्छ र मासुको रंग गाढा रातो हुन्छ। हामीले खरिद गर्दा टाउकोसहितको भैँसीको मासु मगाउँछौँ, जसमा भैँसीको मासुको प्रमाणित मोहर लागेको हुन्छ।” यहाँ फ्रेश भैसीको मासु एडीलेडबाट मात्र आउछ भने फ्रोजन डार्विनबाट आउने गर्छ।

आफ्नो नाम गोप्य राख्न भन्दै एक जना सेफ भन्छन, “कतिपय मेलबर्नका नेपाली ईण्डियन रेस्टुरेन्टहरुले पैसा जोगाउन भेडाको मासु भन्दै गाईको मासु बिक्रि गर्छन भनेर समेत एक जनाले नेपाली संचार रेडियोलाई जानकारी गराए।

उपभोक्ताहरूलाई सतर्कता अपनाउनु आवश्यक : यी घटनाहरूले देखाउँछ कि मासु उद्योगमा अनियमितता कुनै नयाँ कुरा होइन। उपभोक्ताहरूले मासु किन्नुअघि ब्रान्ड, स्रोत, र गुणस्तर प्रमाणपत्र जाँच गर्नु जरुरी छ। सरकारले कडा निरीक्षण प्रणाली लागू गरे पनि केही व्यक्तिहरू अनुचित उपाय अपनाएर व्यापार गर्न खोज्छन्। उपभोक्ताहरू सचेत भए मात्र यस्ता अनियमितताहरू रोक्न सकिन्छ।